جسدها الصغير وقصر قامتها لم يكونا مبرراً لضعفها كما يظن البعض، فمنار مسعد، ابنة الإسماعيلية، التى تبلغ عشرين عاماً، استطاعت أن تخيب ظن الكثيرين وأصبحت بطلة مصر فى ألعاب القوى والمشاركة فى العديد من البطولات.
«لما بمشى فى الشارع الناس بتفضل تبص عليا، ويتريقوا عشان قزمة، ساعات بسكت، وساعات بقولهم ربنا يسامحكم أنا أحسن من غيرى بكتير»، هكذا علقت «منار»، التى قررت أن ترد على الجميع بطريقتها وتروى بداية مشوراها فى ألعاب القوى، وتقول: «الأول كنت بتكسف، انطوائية جدًا، ومبحبش أتعامل مع الناس، واحدة صاحبتى شجعتنى إنى أنزل وأروح النادى وألعب رياضة، بس كنت بقول إزاى هجرى، إزاى هلعب رياضة والناس تفضل تبص عليا، مكنتش متخيلة إنى ألاقى حد زيى».
وتابعت: «بدأت ألعب رياضة من تانية إعدادى، تحت إشراف كابتن محمد هاشم، كنت بلعب جرى، وبعد كده رمح وجُلّة فى نادى الجامعة، ونادى الإسماعيلية، كانت بتواجهنى صعوبات كتيرة فى التمرين مكنتش بقدر أجرى مسافة طويلة، ومكنتش بقدر أرمى الرمح، أو أشيل الجُلّة، لكن الكابتن شجعنى وبدأ معايا واحدة واحدة بالتمارين الخفيفة».
وتستكمل منار مسيرتها: «بدأت بالوثب مسافات قصيرة وبعد كده مسافات طويلة، والرمح كمان، بعد كده دخلت مسابقة كأس مصر وجبت مركز أول فى جرى 100 متر، وبعدها جبت مركز أول فى جرى 400 متر، كمان لعبت رمح ودخلت بطولة الجمهورية لألعاب القوى وجبت مركز أول وفزت بالميدالية الذهبية»، بالإضافة إلى المعاناة التى تشكو منها منار بسبب نظرة المجتمع، لكن معاناة أخرى تتحدث عنها وتقول: «على الرغم من الأزمة النفسية والاجتماعية التى يواجهها الأقزام فى مصر، لا تزال الدولة غير مهتمة بأوضاعهم، إذ إنها لم توفر لهم سبل الرعاية التى يحتاجونها، وعلاوة على ذلك يزيد إصرارهم على تحقيق البطولات فى مجالات مختلفة».
وتسرد منار أحد المواقف التى تتعرض لها بشكل يومى وتؤثر فى نفسيتها: «أنا مثلاً بواجه صعوبة كبيرة جدًا لما أركب الميكروباص، لأنه عالى عليا والناس تفضل تقولى يا عينى يا بنتى هاتى إيدك أساعدك، واللى يتريق عليا، ساعات برد لما حد يتريق عليا وبقوله أنا أحسن منك، وساعات بانهار من العياط، وأسأل نفسى ليه الناس شايفانى كده وبتبصلى كده، الدولة مش معترفة إن الأقزام من المعاقين، قدمت على مصروف شهرى ما وافقوش، احنا مش واخدين حقنا من الحكومة».
تجربة جديدة تخوضها «منار» خلال أيام قليلة، وهى المشاركة فى مهرجان تتويج ملكات الجمال لذوى القدرات الخاصة والذى يقام فى الإسكندرية الجمعة المقبل وتقول: «تم ترشيحى للمشاركة وأشعر بالسعادة لدخولى تجربة جديدة، ستشارك بها عدة فتيات من جميع المحافظات».
المصدر : المصري لايت
